ಪ್ರತಿಯೊಬ್ಬ ಸಾಮಾನ್ಯ ಮನುಷ್ಯನಿಗೂ ತನ್ನದೇ ಆದ ಸುಂದರವಾದ ‘ಸ್ವಂತ ಮನೆ’ ಹೊಂದಬೇಕೆಂಬ ಕನಸಿರುತ್ತದೆ. ಆ ಕನಸನ್ನು ನನಸಾಗಿಸಲು ಜೀವಿತಾವಧಿಯ ದುಡಿಮೆಯ ಹಣವನ್ನು ಕೂಡಿಡುತ್ತಾರೆ. ಆದರೂ, ಇಂದಿನ ದುಬಾರಿ ಕಾಲದಲ್ಲಿ ಕೇವಲ ಉಳಿತಾಯದ ಹಣದಿಂದ ಮನೆ ಕಟ್ಟುವುದು ಅಸಾಧ್ಯದ ಮಾತು. ಹೀಗಾಗಿಯೇ ಬಹುತೇಕರು ಬ್ಯಾಂಕ್ಗಳ ಮೊರೆ ಹೋಗುತ್ತಾರೆ. ಇದೀಗ ಗ್ರಾಮೀಣ ಭಾಗದ ಜನರ ಈ ಗೃಹ ಸಾಲದ ಪ್ರಕ್ರಿಯೆಯನ್ನು ಮತ್ತಷ್ಟು ಸರಳ ಹಾಗೂ ಸುಲಭಗೊಳಿಸಲು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಐತಿಹಾಸಿಕ ನಿರ್ಧಾರವೊಂದನ್ನು ತೆಗೆದುಕೊಂಡಿದೆ.
ಹೌದು, ಗ್ರಾಮೀಣ ಪ್ರದೇಶದ ಜನತೆ ಇನ್ನು ಮುಂದೆ ಬೃಹತ್ ಮೊತ್ತದ ಗೃಹ ಸಾಲ ಪಡೆಯಲು ನಗರದ ದೊಡ್ಡ ಬ್ಯಾಂಕ್ಗಳಿಗೆ ಅಲೆಯುವಂತಿಲ್ಲ. ಗ್ರಾಮೀಣ ಸಹಕಾರ ಬ್ಯಾಂಕ್ಗಳ ಮೂಲಕವೇ (Rural Cooperative Banks) ದೊಡ್ಡ ಮೊತ್ತದ ಗೃಹ ಸಾಲಗಳನ್ನು ವಿತರಿಸಲು ಆರ್ಬಿಐ ಹೊಸ ಮಾರ್ಗಸೂಚಿಗಳನ್ನು ಪ್ರಕಟಿಸಿದೆ. ಈ ಮಹತ್ವದ ನಿರ್ಧಾರವು ಗ್ರಾಮೀಣ ಭಾಗದ ಲಕ್ಷಾಂತರ ಜನರಿಗೆ ಆರ್ಥಿಕ ನೆರವು ಒದಗಿಸುವ ಜೊತೆಗೆ, ಗ್ರಾಮೀಣ ವಸತಿ ಅಭಿವೃದ್ಧಿಗೆ ದೊಡ್ಡ ಬೂಸ್ಟ್ ನೀಡಲಿದೆ.
ಯಾವ ಬ್ಯಾಂಕಿನಲ್ಲಿ ಎಷ್ಟು ಗೃಹ ಸಾಲ ಪಡೆಯಬಹುದು? ಬ್ಯಾಂಕ್ಗಳ ಆರ್ಥಿಕ ಸಾಮರ್ಥ್ಯ ಹಾಗೂ ಅವುಗಳು ಹೊಂದಿರುವ ಠೇವಣಿ (Deposit) ಮೊತ್ತದ ಆಧಾರದ ಮೇಲೆ ಆರ್ಬಿಐ ಸಾಲದ ಮಿತಿಯನ್ನು ನಿಗದಿಪಡಿಸಿದೆ. ಆ ವಿವರಗಳು ಹೀಗಿವೆ:
- ₹10,000 ಕೋಟಿಗೂ ಅಧಿಕ ಠೇವಣಿ: ಇಷ್ಟು ಬೃಹತ್ ಠೇವಣಿ ಹೊಂದಿರುವ ಸಹಕಾರ ಬ್ಯಾಂಕ್ಗಳು, ಸಾಲ ಪಡೆಯುವ ಒಬ್ಬ ವ್ಯಕ್ತಿಗೆ ಗರಿಷ್ಠ ₹3 ಕೋಟಿವರೆಗೆ ಗೃಹ ಸಾಲ ನೀಡಬಹುದಾಗಿದೆ.
- ₹1,000 ದಿಂದ ₹10,000 ಕೋಟಿ ಠೇವಣಿ: ಈ ಮಿತಿಯಲ್ಲಿ ಠೇವಣಿ ಹೊಂದಿರುವ ಬ್ಯಾಂಕ್ಗಳು ಗ್ರಾಹಕರಿಗೆ ₹2 ಕೋಟಿವರೆಗೆ ಸಾಲ ಒದಗಿಸಲು ಅವಕಾಶ ಕಲ್ಪಿಸಲಾಗಿದೆ.
- ₹100 ದಿಂದ ₹1,000 ಕೋಟಿ ಠೇವಣಿ: ಮಧ್ಯಮ ಗಾತ್ರದ ಈ ಸಹಕಾರ ಬ್ಯಾಂಕ್ಗಳು ಗರಿಷ್ಠ ₹1.40 ಕೋಟಿವರೆಗೆ ಗೃಹ ಸಾಲ ವಿತರಿಸಬಹುದು.
- ₹100 ಕೋಟಿಗಿಂತ ಕಡಿಮೆ ಠೇವಣಿ: ಸಣ್ಣ ಮಟ್ಟದ ಗ್ರಾಮೀಣ ಸಹಕಾರ ಬ್ಯಾಂಕ್ಗಳು ಸಹ ಇನ್ಮುಂದೆ ಒಬ್ಬ ವ್ಯಕ್ತಿಗೆ ಗರಿಷ್ಠ ₹60 ಲಕ್ಷದವರೆಗೆ ಸಾಲವನ್ನು ನೀಡಬಹುದು.
ಈ ಹೊಸ ಮಿತಿಗಳಿಂದಾಗಿ ಗ್ರಾಮೀಣ ಭಾಗದ ಕುಟುಂಬಗಳಿಗೆ ಮನೆ ನಿರ್ಮಿಸಲು ಅಥವಾ ಖರೀದಿಸಲು ಅಗತ್ಯವಿರುವ ಪೂರ್ಣ ಹಣ ಒಂದೇ ಬ್ಯಾಂಕ್ನಲ್ಲಿ ಸಿಗುವಂತಾಗಿದೆ. ಸಾಲಕ್ಕಾಗಿ ಎರಡ್ಮೂರು ಬ್ಯಾಂಕ್ಗಳ ಮೆಟ್ಟಿಲೇರುವ ಅನಿವಾರ್ಯತೆ ಇನ್ಮುಂದೆ ಇರುವುದಿಲ್ಲ.
ದೀರ್ಘಕಾಲೀನ ಮರುಪಾವತಿ: 20 ವರ್ಷಗಳ ಕಾಲಾವಕಾಶ ಹಾಗೂ ಇಎಂಐ ವಿನಾಯಿತಿ! ಸಾಲ ಪಡೆಯುವುದರ ಜೊತೆಗೆ ಅದನ್ನು ಮರುಪಾವತಿ ಮಾಡುವುದು ಕೂಡ ಗ್ರಾಹಕರಿಗೆ ಹೊರೆಯಾಗಬಾರದು ಎಂಬ ದೃಷ್ಟಿಯಿಂದ, ಸಾಲ ಮರುಪಾವತಿಗೆ ಗರಿಷ್ಠ 20 ವರ್ಷಗಳ ಸುದೀರ್ಘ ಅವಧಿಯನ್ನು ನಿಗದಿಪಡಿಸಲಾಗಿದೆ. ₹1,000 ಕೋಟಿಗೂ ಹೆಚ್ಚು ಠೇವಣಿ ಹೊಂದಿರುವ ಬ್ಯಾಂಕ್ಗಳು ತಮ್ಮ ಆಡಳಿತ ಮಂಡಳಿಯ ಅನುಮೋದನೆ ಮೇರೆಗೆ ಸಾಲದ ಅವಧಿಯ ಕುರಿತು ಸ್ವಂತ ನೀತಿಗಳನ್ನು ರೂಪಿಸಿಕೊಳ್ಳಬಹುದು. ಅತ್ಯಂತ ಆಕರ್ಷಕ ವಿಚಾರವೆಂದರೆ, ನಿರ್ಮಾಣ ಹಂತದಲ್ಲಿರುವ (Under-construction) ಮನೆಗಳನ್ನು ಖರೀದಿಸುವ ಅಥವಾ ಕಟ್ಟುವ ಗ್ರಾಹಕರಿಗೆ ಇಎಂಐ ಕಟ್ಟಲು 24 ತಿಂಗಳವರೆಗೆ (2 ವರ್ಷ) ಮಾರಟೋರಿಯಂ (Moratorium – ಕಂತು ಪಾವತಿ ವಿರಾಮ) ಅವಧಿಯನ್ನು ನೀಡಲಾಗುತ್ತದೆ. ಅಂದರೆ ಸಾಲ ಪಡೆದ 2 ವರ್ಷಗಳ ನಂತರ ಕಂತು ಪಾವತಿ ಶುರುಮಾಡಬಹುದು!
ನಾಮಮಾತ್ರ ಸದಸ್ಯರಿಗೂ ಸಿಗಲಿದೆ ಸಾಲದ ಭಾಗ್ಯ: ಹೊಸ ನಿಯಮಾವಳಿಗಳ ಪ್ರಕಾರ, ಕೇವಲ ಪೂರ್ಣಾವಧಿ ಸದಸ್ಯರಿಗೆ ಮಾತ್ರವಲ್ಲದೆ, ಗ್ರಾಮೀಣ ಸಹಕಾರ ಬ್ಯಾಂಕ್ಗಳ ‘ನಾಮಮಾತ್ರ ಸದಸ್ಯರಿಗೂ’ (Nominal Members) ಗೃಹ ಸಾಲ ಪಡೆಯುವ ಅವಕಾಶವನ್ನು ವಿಸ್ತರಿಸಲಾಗಿದೆ (ಸ್ಥಳೀಯ ಸಹಕಾರ ಕಾಯ್ದೆಗಳ ನಿಯಮಾವಳಿಗಳಿಗೆ ಒಳಪಟ್ಟು).
ಇದರ ಜೊತೆಗೆ ಗ್ರಾಹಕರು ತಾವು ಮಾಡಿರುವ ಸ್ಥಿರ ಠೇವಣಿ (FD), ಚಿನ್ನ ಅಥವಾ ಬೆಳ್ಳಿಯ ಆಭರಣಗಳು, ಜೀವ ವಿಮಾ ಪಾಲಿಸಿಗಳು (LIC) ಮತ್ತು ಸರ್ಕಾರಿ ಭದ್ರತಾ ಪತ್ರಗಳನ್ನು (Government Securities) ಅಡಮಾನವಿಟ್ಟು ಅದರ ಆಧಾರದ ಮೇಲೂ ಪೂರಕ ಸಾಲ ಪಡೆಯಬಹುದಾಗಿದೆ. ಒಟ್ಟಾರೆಯಾಗಿ ಆರ್ಬಿಐನ ಈ ನಡೆಯು ಗ್ರಾಮೀಣ ಆರ್ಥಿಕತೆಗೆ ಹಾಗೂ ವಸತಿ ಕನಸು ಕಾಣುತ್ತಿರುವ ಕೋಟ್ಯಂತರ ಜನರಿಗೆ ಸಂಜೀವಿನಿಯಾಗಲಿದೆ.
