ಉಕ್ರೇನ್ ವಿರುದ್ಧದ ಯುದ್ಧಕ್ಕೆ ಆರ್ಥಿಕ ನೆರವು ಹರಿದುಬರುವುದನ್ನು ತಡೆಯುವ ನಿಟ್ಟಿನಲ್ಲಿ ಅಮೆರಿಕ ಮಹತ್ವದ ಹೆಜ್ಜೆಯಿಟ್ಟಿದೆ. ರಷ್ಯಾದಿಂದ ಕಚ್ಚಾ ತೈಲ ಹಾಗೂ ಅನಿಲವನ್ನು ಅತಿ ಹೆಚ್ಚು ಖರೀದಿಸುವ ಭಾರತ ಮತ್ತು ಚೀನಾ ಸೇರಿದಂತೆ ವಿಶ್ವದ ಪ್ರಮುಖ ಐದು ದೇಶಗಳ ವಿರುದ್ಧ ಕಠಿಣ ದಂಡ ವಿಧಿಸುವ ಮಸೂದೆಗೆ ಅಮೆರಿಕದ ಸೆನೆಟ್ ಭಾರಿ ಬಹುಮತದಿಂದ ಅನುಮೋದನೆ ನೀಡಿದೆ.
ಮಸೂದೆಯ ಹಿನ್ನೆಲೆ ಮತ್ತು ಬೆಂಬಲ ರಷ್ಯಾ ಮತ್ತು ಇರಾನ್ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವ ಉದ್ದೇಶದಿಂದ ಮಂಡಿಸಲಾದ ‘ಲಿಂಡ್ಸೆ ಒ. ಗ್ರಹಾಂ ಸ್ಯಾಂಕ್ಷನಿಂಗ್ ರಷ್ಯಾ ಅಂಡ್ ಇರಾನ್ ಆಕ್ಟ್ ಆಫ್ 2026’ (Lindsey O. Graham Sanctioning Russia and Iran Act of 2026) ಮಸೂದೆಗೆ ಸೆನೆಟ್ನಲ್ಲಿ 86-11 ಮತಗಳ ಬಹುಮತದ ಬೆಂಬಲ ದೊರೆತಿದೆ. ಇತ್ತೀಚೆಗಷ್ಟೇ (ಜುಲೈ 11) ನಿಧನರಾದ ರಿಪಬ್ಲಿಕನ್ ಸೆನೆಟರ್ ಲಿಂಡ್ಸೆ ಗ್ರಹಾಂ ಹಾಗೂ ಡೆಮಾಕ್ರಟಿಕ್ ಸೆನೆಟರ್ ರಿಚರ್ಡ್ ಬ್ಲೂಮೆಂಥಲ್ ಈ ದ್ವಿಪಕ್ಷೀಯ ಮಸೂದೆಗೆ ಬೆಂಬಲ ಸೂಚಿಸಿದ್ದರು.
ಲಿಂಡ್ಸೆ ಗ್ರಹಾಂ ಅವರ ನಿಧನದ ಬಳಿಕ ಅವರ ಸ್ಥಾನಕ್ಕೆ ನೇಮಕಗೊಂಡ ಅವರ ಸಹೋದರಿ ಡಾರ್ಲಿನ್ ಗ್ರಹಾಂ, “ಈ ಮಸೂದೆಯು ರಷ್ಯಾದ ಆರ್ಥಿಕತೆಗೆ ಬೆಂಬಲ ನೀಡುತ್ತಿರುವ ದೇಶಗಳ ಮುಂದಿರುವ ಎರಡು ಆಯ್ಕೆಗಳನ್ನು ಸ್ಪಷ್ಟಪಡಿಸುತ್ತದೆ; ಅಮೆರಿಕದೊಂದಿಗೆ ಮುಕ್ತ ವ್ಯಾಪಾರ ಮಾಡುವುದು ಅಥವಾ ರಷ್ಯಾದಿಂದ ಅಗ್ಗದ ತೈಲ ಖರೀದಿಸುವುದು,” ಎಂದು ಎಚ್ಚರಿಸಿದ್ದಾರೆ.
ಯಾವ ದೇಶಗಳಿಗೆ ಶೇ.100ರಷ್ಟು ಸುಂಕದ ಶಾಕ್? ಈ ಮಸೂದೆಯು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ರಷ್ಯಾದಿಂದ ತೈಲ ಮತ್ತು ಅನಿಲ ಆಮದು ಮಾಡಿಕೊಳ್ಳುವ ಪ್ರಮುಖ ಐದು ದೇಶಗಳಿಂದ ಬರುವ ಸರಕುಗಳ ಮೇಲೆ ಶೇಕಡಾ 100ರಷ್ಟು ಸುಂಕ (Tariff) ವಿಧಿಸುವ ವಿಶೇಷ ಅಧಿಕಾರವನ್ನು ನೀಡುತ್ತದೆ. ಆ ಐದು ಪ್ರಮುಖ ದೇಶಗಳೆಂದರೆ:
- ಭಾರತ
- ಚೀನಾ
- ಅಜರ್ಬೈಜಾನ್
- ಹಂಗೇರಿ
- ಸ್ಲೋವಾಕಿಯಾ
ಮಸೂದೆಯ ಪ್ರಮುಖ ಅಂಶಗಳು ಹಾಗೂ ವಿನಾಯಿತಿಗಳು
- ಇರಾನ್ ವಿರುದ್ಧವೂ ಕ್ರಮ: ಕೇವಲ ರಷ್ಯಾ ಮಾತ್ರವಲ್ಲದೆ, 1996ರ ಇರಾನ್ ನಿರ್ಬಂಧ ಕಾಯ್ದೆಯ ಅವಧಿಯನ್ನು 2031ರವರೆಗೆ ವಿಸ್ತರಿಸಲು ಈ ಮಸೂದೆಯಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಇದರಿಂದ ಇರಾನ್ನ ಇಂಧನ ವಲಯದಲ್ಲಿ ಹೂಡಿಕೆ ಮಾಡುವ ಕಂಪನಿಗಳಿಗೂ ಸಂಕಷ್ಟ ಎದುರಾಗಲಿದೆ.
- ರಷ್ಯಾದ ಪ್ರಭಾವಿಗಳಿಗೆ ಬಿಸಿ: ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್, ರಷ್ಯಾದ ಒಲಿಗಾರ್ಕ್ಗಳು (ಶ್ರೀಮಂತ ಉದ್ಯಮಿಗಳು), ಹಿರಿಯ ಸೇನಾ ನಾಯಕರು ಹಾಗೂ ಹಣಕಾಸು ಸಂಸ್ಥೆಗಳ ಮೇಲೂ ಕಠಿಣ ನಿರ್ಬಂಧಗಳನ್ನು ಹೇರಲು ಉದ್ದೇಶಿಸಲಾಗಿದೆ.
- ವಿನಾಯಿತಿ ಯಾರಿಗೆ?: ಒಟ್ಟು ನೈಸರ್ಗಿಕ ಅನಿಲದ ಅಗತ್ಯದ ಶೇ. 15ಕ್ಕಿಂತ ಕಡಿಮೆ ಪ್ರಮಾಣವನ್ನು ರಷ್ಯಾದಿಂದ ಆಮದು ಮಾಡಿಕೊಳ್ಳುತ್ತಿರುವ ಮತ್ತು ಆಮದು ಪ್ರಮಾಣವನ್ನು ಮತ್ತಷ್ಟು ತಗ್ಗಿಸಲು ಸೂಕ್ತ ಕ್ರಮಗಳನ್ನು ಕೈಗೊಳ್ಳುತ್ತಿರುವ ದೇಶಗಳಿಗೆ ಈ ನಿರ್ಬಂಧಗಳಿಂದ ವಿನಾಯಿತಿ ನೀಡಲಾಗಿದೆ.
ವಿರೋಧ ಹಾಗೂ ಮುಂದಿನ ಹಾದಿ ಮಸೂದೆಗೆ ಭಾರೀ ಬೆಂಬಲ ವ್ಯಕ್ತವಾಗಿದ್ದರೂ, ಕೆಲ ಡೆಮಾಕ್ರಟಿಕ್ ನಾಯಕರು ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ. ಡೆಮಾಕ್ರಟಿಕ್ ಕಾಂಗ್ರೆಸ್ ಸದಸ್ಯರಾದ ಗ್ರೆಗೊರಿ ಮೀಕ್ಸ್ ಮತ್ತು ಡಾನ್ ಬೇಯರ್ ಅವರು, “ಈ ಮಸೂದೆಯು ಅಧ್ಯಕ್ಷ ಟ್ರಂಪ್ ಅವರಿಗೆ ಯಾವುದೇ ನಿಯಂತ್ರಣವಿಲ್ಲದ ಅಪರಿಮಿತ ಅಧಿಕಾರವನ್ನು ನೀಡುತ್ತದೆ. ಇದನ್ನು ಬಳಸಿಕೊಂಡು ಅವರು ವಿನಾಶಕಾರಿ ವ್ಯಾಪಾರ ಯುದ್ಧಗಳನ್ನು ಸೃಷ್ಟಿಸಬಹುದು. ಇದರ ಅಂತಿಮ ಹೊರೆ ಅಮೆರಿಕದ ಸಾಮಾನ್ಯ ಜನರ ಮೇಲೆಯೇ ಬೀಳಲಿದೆ,” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಪ್ರಸ್ತುತ ಸೆನೆಟ್ನಲ್ಲಿ ಅಂಗೀಕಾರಗೊಂಡಿರುವ ಈ ಮಸೂದೆಯು, ಆಗಸ್ಟ್ 31ರಂದು ಅಮೆರಿಕದ ಪ್ರತಿನಿಧಿಗಳ ಸಭೆ (House of Representatives) ಪುನರಾರಂಭಗೊಂಡ ಬಳಿಕ ಅಂತಿಮ ಅನುಮೋದನೆಗಾಗಿ ಮಂಡನೆಯಾಗಲಿದೆ.
